Maabaf or Bod Dua (Curse of Parents)


Maabaf or Bod Dua

Agor zobanat, Boni Isráil ór háandan ot Joraij nam loi uggwá bicí mocoúr woli aiccíl. É Woli cáf hamíca din e raite numáz dua loi mocgúl táaitou. Ek din Woli cáf ór maa ye, fua ebaadot gorérde éçe zaiyóre, óu fut óu fut gorí bar bár mataáil. Woli cáf numáz ót mocgúl aiccíl dé ótolla zuab noóde. Maar dhak fúni yoré yó, zuab noóde dé ótolla bóli, bezar ói, fua ré bod dua diyé.

Óu Allah, mui maa ye Joraij oré bar bár matai yóre yó, honó zuab nodi, táai gíyegói. Ótolla Joraij óre, uggwá hóraf miala fuar, elzam loi ebaadot hánattu neelai diya zouk, hoói yóre, maa ye bod dua goijjé.

Ek din uggwá hóraf miala fua ye, wolir ebaadot hánat zai, bura ham gorí bélla, Woli cáf óre bíraiye. Woli cáf é, hóraf miala fua íbar buraiyi ré, inkar goijjé. Hóraf miala fua íba, ar ekkán zagar sóol soroya uggwá loi, zená gorí uggwá fua foida óiye. Boostí wála yé fua wár baf honnwá bóli fusár goijjé. Hóraf miala fua íba yé fua wár baf, Woli cáf bóli, banowothi gorí elzam diyé. Hóraf beçi íbar banowothi hotá ré, farailla ókkol é biccác gorí yóre, Woli cáf óre ebaadot hánattu farar baárkule neelai diyé.

Woli Joraij cáf numáz forí, Allahr hañsé azizi gorí dua gorí yóre, guná maf saái yóre baade, farailla manúic ókkol ór muúntu, gura fua íbar hañsé zai fusár goijjé. Óu fua, tor baf honnwá Allahr hókum e hoósai? Ek máicca dudór fua íba yé zuab diyé. Mor maa ye uggwá sóol soroya loi zená gorí mui foida óiyide. Woli cáf loi honó taaluk nái boli, háñzir aiccílde manúic ókkol ór muúntu hóiyé. Ek máicca dudór fuar gobá loi baade, farailla ókkol é, Woli cáf behosúr dé yían fai sóllah goijjé.

Aññí oñnorá ré yián hóitóu saáir dé, uoror hotá gún óttu buzá zardé, maar bod duar zoriya, Woli cáf óttu beizzoti wáa foijjé. Maabaf or bod dua honó háalot ot rod noó. Maabaf or nafórmani no goijjó.
Lekóya: Amír Hákím