Muhábbot or Cáigor (Ocean of Love)


Muhábbot ór Cáigor (Ocean of Love)


Monot

Monot rakís ek din, aññí yó aiccílam.
Duk kín añár hañsé rakí, cúk kun sób tuáñre dilám.

Tuáñr diya sób duk kún, céc bela búli dilam
Cúdu monot rakís ek din, tuáñr facé aññí aiccílam.

Moulana Mohammed Rafique Mir Ahmed, Quebec Canada.  OK
Entezar

Aibá hoilá nu aáila, tuáñr entezar ot aiccílam,
No buzíla, tuáñre hotó ze, miss goijjílam.

No manilá honó din, tuáñre hotó afon báfilam,
For báfi yáa hoctho dilá, ohoman tuáñrtu faáilam.

Cíar no goríla honó din, kintu tuáñr sób duk kór bág, nitou saáilam,
Tuñí becí ragi, yían zaintam, fattóri dil, ar eto berahámot yían, no zanítam.

Beil dhufí añdár óilou, tuáñr nái dehá,
Fójor óilou foór fáçi, céc foijjonto boói roilám eka.

Zodi faile dil to duk, no óiyo bezar,
Maf goríyo, monot tulí mor diya cúk, hára zibon boói táikkoum, gorí tuáñr entezar.

Moulana Mohammed Rafique Mir Ahmed, Quebec Canada.  OK

Rag

Becí guccá goróon maincóre, duniyai arde akhérot óre hálak gorí de,
É hotálla guccát tun hári tákoon zoruri.

Mone mone guccá ói, no goríyoum rag,
Rag dehái táki zodi, hárai diyoum bág.

Afon zon e dilé zodi, boro ohoman,
Cáda muké kúci tákoon, yían óilde boro buddíman.

Burar bútore becí bura, rag jiníc cán,
Nizoré foóñsai de hóraf ot, aróu gorí de ferecan.

Rag no gorá asé hókum, Nobir (S.A.W ) hádis ót,
Hotát hotát golot buzí, guccá óon bekuf or alaamot.

Kobbiyat tulá giyé, Nobir (S.A.W ) fórman,
Amól gorí zodi farilé, akhérot ot faiyoum jonnot tán.

Hózorot Abuhuráira (r.z) anhúttun riwayot óiye de ki, uggwá manúic Rosúl (S.A.W) óre hoilou, añáre kissú nosíyot fórmo, taáñi fórmailou :
Rag no goríyo, manúic cwá yé barbár Rosúl (S.A.W) ór hañsé nosíyot saáilou Rosúl (S.A.W) é fórmailou : guccá noói yo.  [ Bukhári:  6116 ].

Moulana Mohammed Rafique Mir Ahmed, Quebec Canada.  OK
Soli Zaiyoum

Así ar hodin. Zaiyoum soli ek din.
Muhábbot gorí tuáñre, no búliyoum honó din.

Ze din zaiyoum soli, maf gorí diyo moré.
Óit fare hoctho diyí tuáñre, háñcí muké bidai diyo moré.
“E zibon muhábbot goijjóum, seróf tuáñre ar tuáñre”.

Moulana Mohammed Rafique Mir Ahmed, Quebec Canada.  OK

 

Zibon

Ek kale aiccíl cómo, zaitam eskul ot dhorai dhorai,
Aijja ekka ekka dhor sára, zogot gúri berai.

Ek thaim ot, eskul ot gunthú loitou, elóm or fisé cómoi ditam fúrai,
Aijja ehón thiañ’r fisé fisé, duuñri berai.

Cícu hale, cámainno zohóm e, félaitám hañdi,
Ar aijja zohómi, dil loiyó, háci uçí.

Age olfo hotát , óitou hoijja fósat,
Aijja dorot bon óu , zargói síri cádaran hotát.

Zibon e zindigir sofór ot, boóut kessú diló cíkai,
Buzar age zibon e, boóut kiessú diló buzái.

Boro óibar lalós e , baicfoni dilám haçai,
Lalsír báil ot fori, zindigi re dilám hárai.

Juwanir fúrutir acái, baicfoni ré dilám haçai,
Burá hale afsús gorír, ahá rée, juwani ré dilám keéne hárai.

E cób báfi báfi , soli zaiyoum ek din,
Ahá afsús gorí, mor afon zon e, hañdi bou kissú din.

Férom ot rakíbou mor, fothú kéñsi ho ek din
Mor furani ar muhábbot, dorot bon óll ór dil ot táki bou zoto din.

Lekí lam, e kobbiya wá, loi nizor kaháñni,
Bar bár monot uçér, furan hotá ar baicfoni .

Moulana Mohammed Rafique Mir Ahmed, Quebec Canada.  OK

Bét

Muhábbot or e bét tán, no goríc aám,
Cóhid or jozbat óre, no goríc bodnam.

Bós eddur buzí lo, seróf tui añár jan,
Añár, e lofzó gun óre, no goríc nilam.

Moulana Mohammed Rafique Mir Ahmed, Quebec Canada.  OK

 

Ek fúça faní

Nalár faní, hál ot zar, hál or faní, doriyat zar,
Mogor, hoói no fare kiyé, souk ór faní hoçé zar.

Zór dilé duniyai ye zane, souk ór faní báaile, kiyé no zané,
Duniyair zór asman ottú fore, mogor, muhábbot or zór,
dorodbon or souk ór kunottú, fore.

Souk ór fanír kimot, buzá zaibou hoóñtte,
Nizor souk ór faní, niyoillé héeñtte.

Ek fúça fanít ó, faníban ói fare,
Zodi óile fiáñrar gór.

Rai fán muhábbot ot ó, cúk fait fare,
É muhábbot ot zodi tákile ador.

Moulana Mohammed Rafique Mir Ahmed, Quebec Canada.  OK

 

Gular bór gasé cóo

Théila ttú júfa fore ,
Fól zendila óuibou óuk
Ahámiyot seróf sáiyar ,
Gas zennila óuibou óuk.

Foror gór ar duniya,
Cúndor óuile you ki óuibou
Wapes fíri aá fouribóu,
Nizor gór zennila óuibou óuk.

Fuáñti zaite sófor ot ,
Mojburi ar ferecan lagilé yóu
Rasta to haça fouribóu,
Hám sófor zennila óuibou óuk.

Serag nifái te aasan noó ,
Boiyar óuile óuk
Hát re dhebal banai do,
Boiyar zendila óibou óuk.

Áñçibar tomonná hom óuile yóu ,
Yían soó de ki
Hímmot kaiyem tákile ,
Rasta zendila óuibou óuk.

Sófor ot óran no láibou
Rasta bahañ óuile yóu
Hám sófor bála óuile,
Cómoi haçi zaibóui ót no faiba
Rasta lamba óuile yóu.

Moulana Mohammed Rafique Mir Ahmed, Góngri Fara ,Quebec Canada.