Ruáinga Zuban Ibár Húbi ókkol ki? ( What are the quality of Rohingyalish?)

Ruáinga Zuban Ibár Húbi ókkol 

  1. Ruáingalish ót beggún é seróf (28) wá hórof asé, ziyán ór duara maincór tú cíkité bicí asán óiye.

  1. Zará seróf ABC hórof pun forí zane, zuban ibá cíkite bicí asán, kiálla hoilé, leká lói forá lói ebbre ekku borabor dé ótolla.
  2. Seróf, Ruáinga koum bóuli noó, zehoníkka cíkitou saáile yó, bicí toratori cíki faribóu.

  1. Zuban ibá cíki bélla seróf (5) miníth óttu (15) miníth foijjon to lagedé, furafuri buzí loite, zodi hóníkka muúntu boói cíkai derdé óile.
  2. Intarnét óttu tái cíkitou saáile, ekkená gorí thaim lagibóu, nizebaze buzí loi faribélla.
  3. Zindila óibou óuk, sóiyi gorí lekí forí fari bélla, kessú meénnot ó gorá foribóu.

  1. Zuban ibá estemal goríbélla kessú baár ór forugram noláge. Zehonó komputar ot lekí fare, mubáil ót ó lekí fare, aró oinno kisím kisím ór komputar ókkol ót ó mockil nái lekí bélla.
  2. Maikuru.sóft Wíndhus (Microsoft Windows) ót gutá hórof ókkol (áéíóú) arde “ç” arde “ñ” lekí bélla US-Intarnécenél Kíbuth (US-International Keyboard) séth gorá foribóu, kontróul penel ot zai, asán ór sáñte kíbuth bodoli faribá.

  1. Mubáil ót mazé kessú bodoli bélla zorurot noó, seróf hóróf hodún óre sibi dórile oinno hórof ókkol uortú aibóu, tóile lagerdé hórof gwa basí loi faribá. Mesál hísafe, “c” ré ekkená gorí sibi dóile “ç” hórof neeli aibóu. Éndila “n” óre sibi dóile “ñ” neeli aibóu. Ar “a” ré sibi dóile “á” aibou, éndila oinno gutá hórof ókkol óre yó aní faribá.

  1. Zuban ibá endila asán dé, aññí údda banai baáde, aññí kengóri banaiyí hóoi, hóiran ói giyígoi. Bazu kiyóre, kessú no cíkai, dhaárik kitab forí félai fare. Allah bicí rahámot, Allah ye añára ré endila uggwá zuban bokcíc goijjé dé ótolla.