Eid Mubaarek din[မူဆလင္မ်ား၏ အီဒ္းပြဲေတာ္ေန႔]

Iid ór saan

Iid ór saan

Iid [Mubaarek Din]

Assalámu aláikum, Beggún óre iid mubaarek.

Añára musólman óttu fotti bosór romzam or ruza fúrai tarfoddín Iid mubaarek din oré bana. Iid ór din oré bazu zagat mazé ek din bana. Bazu zaga ókkol ót dui din ar tin din ó bana. Iid no aibár tin din age lóti, fañs wokto numás ót mazé tokbir(Allahr taarif) ó foré. Iid ór din beínna Iid ór numás óre beggún mosóid ót zai jomaát bañdí fore. Iid ór numás ek niyot dui rokaát ót sówa tokbiir(Alláh huákbor) foré. Bazu cóor ókkol ót manuíc becí óile iidgá(dhoñoór zaga ar bil) banai iid ór numás foré.

Iid ót mazé nanandhoilla nasta ókkol bana. Haás gorí añárar arakan ót ruáinga musólman ókkol é sémai, cuthki, hálwa, luçi fiçá, gura fiçá, óloiddá binibát, sonabuth íin ókkol bana.

Iid ór numás foittó zaibar age miça nasta ókkol háiza. Numás forí baade egena guccí ókkol ór gór ót banaiyé dé nasta ókkol ditouza. Ar ek zon oré ek zon é sólam de, aza azi goré, ar maf saá. Ek zon or gór ót ek zon é beraitóu za. Ar iid ór din asór ór numás baade hoborostán ót zai, beggún é ziyarat ó goré.

Gura fuain dé manuíc ókkol loót failé sólam de. Gura fuian ókkol óre dhoñoór manuíc ókkol é iidí(thiyañ) de. Gura fuain ókkol bicí kúci ó. Noya hoór ókkol fiñdí iid ór numás foittóu za ar kúcbo ókkol ó lagai za. Gura, burá beggún é noya hoór ókkol kini fiñdé. Bicí kúci lage.

Haas gorí romzan or ruza raiké dé ítarar lá bicí boro kúcir din. Romzan ek máic ruza rakí waáicca táki baade iid ór din bála bála nasta ókkol hái fare. Ar romzan or ruza raki Allah ré razi gorí faijjé dé étolla bicí kúci ó.

Añára beggún é fotti bosór zendila gorí iid óre banai, e bosór ó éndila iid banai ek bái óttu ek bái yé maf saái kúcir iid banai yóum boulí acá gorír.

Lekóya: Citizen Of Arakan [Bormá, Aikkab, Nazir fara]